Briefmarke

E Briefmarke isch d Bestäätigung vom ene bostalische Beförderigsundernääme, ass dr Bedraag, wo de Beförderig vo dr Bost chostet, zaalt worde isch. Briefmarke wärde mäistens uf Babbiir druckt, si üübligerwiis rächteggig und häi uf dr undere Site e Gummierig. Zum d Marke besser vom Booge chönne abdrenne, git s mäistens zwüschene e Perforierig, d. h. reegelmäässigi Räije vo chliine Löcher im Babbier (Zeenig). Wemm mä e Beförderigsläistig oder anderi Läistig vom Undernääme in Aaspruch nimmt und käi anderi Zaaligsart vorfsee isch, wärde Marke an dr Stell, wo drfüür vorgsee isch ufkläbt, zum noochwiise, ass d Gebüüre zaalt worde si. Für zum verhindere, ass ass d Briefmarke no äinisch chönne brucht wärde, wärde si mit eme Boststämpel, mänggisch au mit eme Chuugeleschriiber oder eso, markiert und eso entwärtet.